Tipa Times

Tari.23rd Aug. (pachynoh) liana khata St.ZT.Pawsa cha Zyhno khih tawta Tipa avaw ngia ta, he nona heta,Tipa liata MTP zy nata M.Ch.P sub-Hqrs.zy ta rohna kawpata pawpi pachhih chhaota vaw dy eita, Puhpa,K.Palai,Pre.Sub-Hqrs.Tipa ta chhithana ry liata prog.he noh y ta MTP Hall liata ahmahpa a cha.
M.Ch.P nah zy heta Mara dress akipa ta a tobi khaipata,Sawla kia angia kawpata lah eita,he he Pawsa ta a yna su,Armania liata zy Mongyu rah liata zy a viasa nah a pahmo awhpa acha.

He khai tawnaheta St.ZT.Pawsa ta bie reina hneita, Mara reih he Khazohpa ta a eih-hrapa ta miah apiepa chata, keimo a hneitupazy ta eima paso thai awhpa a byu zie zy reita,Marasaw bawlaw ta eima reih a chei thei khao leipazy a ma y holo ha bapa cha palo pasa a chhihzie a thata rei ta rei he eima chi nata pho pabosana chhaichhi peimaw kawpa a chanazie nata eima reih he eima pahlei khiatala eima chi nata pho chana he eima pahlei tlamaw'na tahpa ta " Eima reih he eima pahlei daihma hana" tahpata arei.

St.ZT.Pawsa heta Marah rah chata a Vision satho(3)zy cha zawpizy hnota phuata, chazy cha :
1. THOHNA-O :
Mara rah liata Thohna O padua awhpata Zyhno khih liata No-pawpazy a saohiah ta, asu he Zyhno rah liata mohpa a cha.Zyhno No-pawpazy ta Zyhno Ti nata rah pha kawpa cha Thohna o su awpata pasai kawpata 200Hectre lai ama piepa vata St.ZT.Pawsa ta Zyhno Nopawpazy choliata alyna zie a thata a reih.
"He Thohna O he Marasaw zydua chata paduapa cha awta, Marasawzy ta chi hropa nata phohropazy chata byhna eima cha theina awhpa a cha awh." tahpata St.ZT.Pawsa ta a reih. He Thohna-O liana heta Department hlupi padua awhpata hnabeiseihpa a cha.

He Thohna -O awhpa su he Zyhno nata Khopai khih liata a ypa chata,Tlah laikawpa nata a ngiakawpa, ngiaryh a chhih kawpa sathoh ta a syhpahmaopata a duapa a cha. He tlah he " Mara Calvary tlah ngia" tahpata St.ZT.Pawsa ta amoh chhao a biepah haw. St.Pawsa ta a reidah ta cha, " He tlah sathoh a sypahmaopa heta ngiapana liata chhao symbol yzie hneipata a duapa chata, Paw, Sawchapawpa, Thlapathaipa moh aphaopa na a cha" atah. He Thohna-O he hako,2009 pa tawh khita pathao thei awhpa a chhuapa hawta arei.

2. MISSIONARY THLA :
He RA.Lorrain thlasu he Marasaw zydua chata thlahpa lata eima bona nata eima thlalona su pipa a chapa ta rei ta, he Thlasu taona lia heta St.ZT.Pawsa ta Rs.13lakhs vaw pasai hata, atahma eima rah la a vy no heta anoh pohpa tlaita nohtho(3) chho tlai he o he a sapah hra.He no he 19th Aug.-21st tai kha Thla-o sahna liana kha yta, he Saikao khih chho liata a y no heta Saikao khitlah VC zy,MTP,M.Ch.P zyta Vao 3 lai thie eita, noh-4 chho tlai apakyhna hnei eita, "Khazohpata Mara rah he byhna a pie khona" tahpa biepipa hmahpata Saikao liata bie a rei.
Pihno,Vaihli nata a chhokhazy ta Mie nata Aw thiepata pati nie aw eita, aly kawpata ama nie. Pihno, Vaili ta biereina hneita, "Marasaw zy he thlakhao ei ngia hlata ama pohkhapa hmopa ei byu ngaita,Pawsa y, vaw tiama via lyma ma y" tahpata Pawsa hnota bietana a hnei hra.

3. MUSEUM :
Mara chi nata pho a boh thei nawpata cha Marapata Musium a hnei awhpa a byu.He Museum heta hlano mahno-mahpaw zy ama tobina chhaichhi zy,Dawkho nata Kaotla zy,Chiahmie etc.zy nata Chariah ama dyu nota ama hmah tyhpa chhaichhi zy nata ama khihsana liata ama hmahtyhpa chhaichhih zydua so khaipa cha awhta, English nata Mara reih ta a chhopasiana chhao sopah khaipa a cha aw tahpata arei.
He he Tipa liata MTP nata M.Ch.P etc. zy ta Museum he Mara rah nata Mara chipho chata hmo peimaw ngaitapa a chapa vata,Tipa khih he marah rah liata a liahchho (Center)chaina su a chapa vata Tipa khih liata padua theipa chasala, tahpata St.Pawsa hnota a saohiahpa a chapa hawta Museum padua nawpa su chata Tipa khih raopa chata, M.T.P nata M.Ch.P zy ku liata chhao khazie rakhama cha pahnie hawpa a cha hra.

St.ZT.Pawsa he nochhi Mara rah chakah bao awhpata Marah rah he 23rd July ta a vaw ngia ta, chasala Burma Pheisai sawka la tawta buabana a y hapa vata a rah a ngia thei leipata Aizawl la kua pata Mawrah sawkha nata mongyu zy bie a chho khai totaw Mara rah la vaw kua heih ta, Saikao,Tipa,Zyhno,Khopai,Laki,Siaha ,Aizawl Mara Churches nah zyta daiti pie lyma eita, ‘ Khazohpa china’ tahpa nata ‘Phusa Taka he eima chakao awhpa cha leipata, phusa taka ta keimo miah a chakao hri awhpa a cha’ tahpa biepipa he bierei chakaona a hneina maih liata a hmah lai lyma pa a cha. Tipa liata ECM Local Church sathoh(3) nah zy chhao ta bierei chakaona,daihti pathaipa he pie khai hra eita, 23rd July(Sat) za ta ECM T.Salem liata rei ta, 24th July(Sun)my ta ECM.T.Electric liata, 24th July (Sun)za ta ECM T.Local liata a daiti he a ahmah. Daihti a hmahna maih lia heta zawpi chhao ama kip ha ngaita tyh. Nochhi Marasaw lialaipi,Vasai,Saby,Hloma, Para, Mala, Locheipi, etc.. khi to tawta chhaota utheipa hlupi ta St.ZT.Pawsa he ama za zi hra.

Tawla,St.ZT.Pawsa he MEC Awnanopa tawta Pastor 5 nata Evangelist 3 chhao ta ama za zi hra.
"Chakah baona chata Sapha 700bags pato-patiapa chata, chacha nochhi Mara lata chakah viapazy khih liata paphao haipa a cha".tahpata St.ZT.Pawsa ta a reih.

Atlaleipazy chysa 3800 rachho ta apamohsa eita, Prince Charles ta Thohna apiepa zydua hmahpata he a tlaleipa zydua he amohoh ei.

" Centenary byhna ronah ngaita kawpazy Abeipa ta miah pieta,Marah rah Ti nata tlah liata avaw tlo lymapa vata Khazohpa lata alyna bie reipa he eima phahla awhpa cha vei" tahpata St.Pawsa heta a rei hra.

Nochhi lata Marapa chakahpa khi tawta chysa 45 ama khih chyu vyuhpata Aizawl tai a tanoh kha sie awhpata ama thao haw.He 45 penaw zy he Siaha vaihpi Awnanopazy ta O-tloh araih eita, 26th Aug. (myla) khi ta Aizawl la ama patla awh. He deligate penaw heta Aizawl liata Mongyu tawta avaw tlo awhpa deligate nahzy nata amah mo/tyh awh. He zydua he St.Pawsa pato-patiapa a cha.
He deligate zy meeting Aizawl liata ama hnei khai tawta St.Pawsa cha London la pangai pata 2nd week Septembe liata Armenia atlo thei heih awpata hnabeiseipa a cha.